خطوات بيع أو شراء عربية مستعملة عشان ميضحكش عليك

ليك مزاج تشتري عربية جديدة بس مش عارف تعمل إيه فـ عربيتك القديمة، أو فلوسك مش هتقدي عربية على الزيرو وبتفكر تشتري مستعمل! لو انت واحد من الاتنين دول فـ محتاج تعرف شوية خطوات تسهل عليك الموضوع عشان ميضحكش عليك في الفلوس أو الاجراءات القانونية.

بيع العربية المستعملة:

 ازاي تبيع العربية؟

في الأول محتاج تعمل دعاية للعربية بين اللي حواليك من أصحابك وعيلتك، وممكن كمان تحط ورقة علي العربية تعلن فيها أنك ناوي تبيعها وتكتب رقمك للتواصل. 

لو موضوع الدعاية مجبش نتيجة يبقي الحل في سوق العربيات، وأشهر سوق من النوع ده هو "سوق العربيات فى الحى العاشر"، وده بيقام يوم الجمعة والأحد من كل أسبوع. 

شراء العربية المستعملة:

قبل ما تبدأ تدور علي عربية تشتريها محتاج تحدد السعر اللي هتقدر تدفعه، أو تقرر إذا كنت محتاج تأخد قرض.

تقدر تقارن بين قروض العربيات في البنوك المختلفة على فايدتي، وتستخدم كمان حاسبة القروض عشان تعرف القرض المناسب ليك.

إجراءات بيع وشراء العربية:

خلاص اتفقتوا؟ يلا نبيع العربية، في البداية هنكتب عقد ابتدائي، وده عقد بتشتريه من اي مكتبة بيعتبر اتفاق مبدئي لغاية ما يتسجل العقد في الشهر العقاري بعدها بأيام او بأسبوع، عشان يستلم الشاري العربية ورخصتها بعد ما يدفع باقي فلوسها. وممكن مع العقد ده يستلم الشاري العربية في حالة أنه دفع معظم سعرها.

العقد الابتدائي:

-العقد لازم يكون فيه،

• المبلغ المدفوع والمبلغ اللي فاضل.
• تاريخ ووقت إستلام العربية.
• إمضاء الشاري والبايع.

-بعد ما تعملوا العقد ماتنسوش تصوروه عشان كل طرف يأخد نسخة منه.

رخصة العربية:

-الرخصة بتعتبر مستند ملكية العربية، ولازم تنتقل من البايع للشاري بعد دفع المبلغ كامل.

-الشاري بيراجع الرخصة محتاج يتأكد من نوع العربية وسنة الموديل و سي سي الموتور.

-لو الرخصة كانت منتهية فمن حق الشاري يطلب شهادة بيانات من البايع.

-لو العربية ليها توكيلات فلازم الشاري يتأكد أن البايع اللي اسمه في الرخصة هو هو أول اسم في التوكيل.

-الرخصة المنتهية ليها فترة سماح شهر واحد ويفضل انها متتنقلش بين أكتر من شخص. 

سعر العربية:

-وانت بتكتب العقد بتدفع حوالي نص المبلغ اللي متفقين عليه وتقدر تطلب استلام العربية في نفس اليوم.

-اطلب رخصة العربية وانتم بتسجلوا العقد في الشهر العقاري.

- من حقك كمان تطلب شهادة المخالفات وانت بتكتب العقد، وتقدر تروح تكشف علي المخالفات بنفسك عشان تطمن.

-لو ناوي تقسط و متفقين على كده، برضه من حققك تستلم العربية مع كتابة العقد الابتدائي.

-حاولوا متأخروش تسجيل العقد في الشهر العقاري علشان كل واحد يبقى ضامن حقه.

بعد ما تعملوا العقد ماتنسوش تصوروه عشان كل طرف يأخد نسخة منه

خالي بالك:

لو ناوي تبيع:

• قبل ما تقرر تعرض عربيتك للبيع محتاج تكون عامل لها صيانة ومصلح أي مشاكل، ومنضفها من جو وبرا لأن ده ممكن يأثر في زيادة سعرها.
• متنساش تزور إدارة المرور اللي تبعك عشان تدفع أي مخالفات عليك.
• لو قررت تروح سوق العربيات خالي بالك من سماسرة السوق، لأنهم هيحاولوا يشتروا منك العربية بأقل من تمنها عشان يبيعوها هما بسعر أغلي بعد ما يحسسوك أن عربيتك متسواش أكتر من كده.

لو ناوي تشتري: 

• لو شفت عربية عجبتك لازم تعمل بحث عن أسعار السوق قبل ما توافق على السعر المعروض.
• قبل ما تكتب العقد:

-ما تنساش تفحص عدد الكيلومترات اللى قطعتها العربية، وخالي بالك في ناس خبراء في تعديل عداد العربية عشان يقللوا عدد الكيلومترات.

-أفحص العربية في مركز متخصص عشان تتأكد من سلامتها، وممكن تطلب شهادة مختومة بعد الفحص عشان تطمن أكتر.

-يستحسن تأخد معاك حد بيفهم في العربيات عشان يفحصها قبل ماتكتب العقد، ممكن يبقي حد متخصص في كده أو واحد صاحبك ليه خبرة.

-متنساش تتأكد من فحص الموتور وتدقق في صوته، وتعمل فحص ميكانيكا للعربية، اللي هي الفرامل والازرار والديركسيون..إلخ.

-فرش العربية كمان محتاج تتأكد منه إذا كان كويس ولا محتاج تغير عشان ده هيفرق في سعر العربية.

مبادرة  "Go Green" 

وزارة الصناعة بالتعاون مع البنك المركزي اشتركوا في مبادرة جو جرين اللي هتحول العربيات للعمل بالغاز الطبيعي، وتقدر تستفيد من المبادرة ديه لو عربيتك مر على صناعتها أكتر من 20 سنة. تقدر تعرف أكتر عن باقي شروط المبادرة من موقعها الرسمي، وممكن تقدم من علي اللينك ده: التقديم لتحويل السيارة للغاز الطبيعي