هو التقسيط فكرة كويسة؟

في الفترة الأخيرة، وخصوصاً بعد تعويم الجنيه، إمكانية التقسيط انتشرت جداً، حتى بقى الموضوع إنك ممكن تقسط لعب أطفال كمان. بس هل التقسيط فكرة كويسة؟

مكونات التقسيط:

التقسيط بيبقى شبيه بالقرض الشخصي، لإنك بتقول للبنك يدفعلك، وأنت بعد كدة بتقسط للبنك أو المحل، وطبعاً خطط التقسيط بتختلف من بنك لبنك، ومن محل للتاني، بس المكونات الرئيسية للتقسيط هي:

• نسبة الفايدة المضافة: على المبلغ اللي بيتم تقسيطه، ساعات بيبقى فيه فايدة مضافة وده معناه إنك بتدفع مبلغ زيادة على تمن المنتج ، وفي بعض الأحيان بيبقى التقسيط بدون فوايد وده عشان بتبقى الفايدة محسوبة في السعر من الأول، فلازم تسأل على خطة التقسيط المتاحة.

• المقدم: ساعات لازم تدفع مقدم، وساعات مابيبقاش في شرط لمقدم، بس عامة لو هتقدر تدفع جزء من تمن المنتج ده بيبقى شيء كويس عشان بيقلل المبلغ اللي بيتم تقسيطه، وبكدة أنت بتقلل الفايدة اللي بتدفعها، ومدة التقسيط كمان.

• مدة التقسيط: كل ما تزود مدة التقسيط، كل ما القسط الشهري بيقل بس طبعاً نسبة الفايدة المدفوعة بتزيد، بس في نفس الوقت أنت بتربط نفسك وقدرتك على الصرف لمدة أطول، وده ممكن يقلل من حريتك. وفي نفس الوقت لازم تحسب تدهور القيمة المالية للمنتج اللي أنت هتشتريه. فلو على ما تخلص التقسيط، القيمة المالية للمنتج ده هتقل عن النص، يبقى ممكن التقسيط ما يبقاش له لازمة.

• القسط الشهري: كقاعدة عامة، ماينفعش الأقساط عامة تاخد أكتر من نص مرتبك، وده طبعاً بيعتمد على مدى أهمية المنتج ده بالنسبة لك. يعني لو مثلاً تكييف البيت الأساسي، يبقى أكيد هيبقى أهم من تجديد تليفونك الشخصي.

التقسيط بيبقى شبيه بالقرض الشخصي، لإنك بتقول للبنك يدفعلك، وأنت بعد كدة بتقسط للبنك أو المحل،

امتى بيكون التقسيط مفيد؟

• لو قيمة المنتج عالية، بس أنت محتاجه ومش عايز تصرف كل فلوسك مرة واحدة.
• لو في تخفيض على المنتج.
• لو التقسيط بدون فوايد، وده معناه إن قيمة المنتج مش بتزيد مع الوقت.
• لو مافيش غرامة على دفع القيمة الكاملة للمنتج في أي وقت.