هيحصل ايه لو اتأخرت في سداد بطاقة الائتمان/Credit Card

بطاقة الائتمان بقي ليها استخدامات كتير في حياتنا اليومية، وده بيخلي الإقبال يزيد عليها، لكن قبل ماتفكر تقدم عليها في أي بنك محتاج تعرف أن أستخدامها مش سهل وبيحتاج منك التركيز في كل مرة هتقرر تستخدمها، لأن مفيش فايدة بتنزل على الكارت فى حالة سداد المبلغ اللي عليك فى فترة السماح، يعني لو بتسدد فى ميعادك مش هتدفع غير اللي سحبته، بس الحاجة اللي بتخوف بعض الناس من الكريدت كارد/ Credit Card هي أنه على عكس كل القروض اللي بتنزل عليها الفايدة بشكل سنوي، بطاقة الائتمان فايدتها بتبقي شهرية.

وفترة السماح هي فترة بتتراوح ما بين 48 لـ 58 يوم، بتقدر تسدد فيها قسط الـ credit card من غير فوايد، بس لو حصل أي تأخير في الدفع فـ الفايدة بتتحسب على كل يوم هتتأخر فيه، وده كمان هيأثر على الـ I-Score / التاريخ الائتماني بتاعك وده هيخلي البنك يكون عنده تحفظات في الموافقة على أي تمويل في المستقبل والعكس صحيح، لو بتدفع مديونية الكريدت كارد في ميعادها قبل ما تخلص فترة السماح هتحسن من تاريخك الائتماني بشكل كبير وده هيساعدك البنك يثق فيك أكتر في التعاملات الجاية.

ازاي تحسب الفايدة لو اتأخرت في السداد؟
 

اول حاجة بيكون عليك غرامة تأخير في السداد ودي بتكون أما نسبة أو مبلغ ثابت حسب كل بنك، وبعدين على حسب الفايدة اللي محددها البنك على بطاقة الائتمان بتاعتك بتحسب الفايدة هتكون بكام فى اليوم وتحسب عدد الأيام اللي اتأخرتها عن فترة السماح هتكلفك كام فوق مبلغ القسط.

أو ممكن تريح بالك وتحسبها على حاسبة فوائد بطاقة الائتمان على فايدتي.

ازاي تسدد مديونية الكريدت كارد/Credit Card؟

1- اصدار تعليمات للبنك

تقدر تبلغ البنك تعليمات انهم يسحبوا المديونية بالكامل أو الحد الأدنى بس من حسابك والبنك تلقائياً هيسحب المبلغ كل شهر.

2- الانترنت البنكي

وده عن طريق تقديم طلب الاشتراك فى الخدمة عن طريق فرع البنك، وبتحصل على اسم مستخدم وكلمة السر الخاص بالخدمة من البنك، بعد كده تقدر تسدد مديونية بطاقة الائتمان عن طريق موقع البنك بكل سهولة كل مرة.

3- التحويل من بطاقة الخصم المباشر

لو عندك بطاقة خصم مباشر أو البطاقات المدفوعة مسبقاً زي البطاقة اللي بتقبض منها، ممكن تحول منها قسط فيزا المشتريات عن طريق الـ ATM او أبلكيشن البنك.

اعرف أكتر عن الكروت البنكية المشهورة من هنا، أشهر 6 انواع من الكروت البنكية فى مصر

4- الـ ATM

تقدر تعمل ايداع للقسط كاش أو تحويل من بطاقة الخصم المباشر في أي ماكينة ATM موجود فيها اختيار الايداع.

5- فوري (لعملاء البنك الأهلي فقط)

دلوقتي عملاء البنك الاهلي يقدروا يسددوا اقساط الكريدت كارد/ Credit Card عن طريق أي منفذ لـ فوري قريب منك، وده هيسهل عليك مشوار الدفع والزحمة بشكل كبير جداً.