وفرت قد إيه من الشغل فى البيت فى زمن الكورونا؟

فى زمن الكورونا اضطرت معظم الشركات تقعد موظفينها في البيت، ومع طول القاعدة الموضوع مبقاش اجازة وابتدي الـWorking from home ، يمكن فى الأول تكون زهقت إلا النزول، ولو صاحب شركة أكيد بقيت حابب تتابع الشغل فى المكتب وقدام عينك، لكن لو ركزت على الفلوس اللي وفرتها فى الفترة ديها، هتلاقي أنك كسبت كتير، ويمكن كمان تحب تجرب تاني الشغل من البيت:

1. الموصلات: لو معاك عربية فأكيد وفرت البنزين، ولو بتركب مواصلات فأرخص اتوبيس بقي ب5 جنيه ارخص تذكرة مترو برضه بقيت 5 جنيه، وعداد التاكسي بقي بيبدأ ب 7.5 جنيه، يعني من الاخر وفرت من 10 ل 20 جنيه فى اليوم، فى حالة انك مبتركبش كذا مواصلة

2. الأكل: لو هتفطر فى المكتب هتصرف على الأقل 10 جنيه ساندويتشات فول وطعمية، ده لو مش ناوي تجيب وجبة كاملة أو تتغدي كمان هناك، فممكن نقول أنك وفرت من 10 ل 50 جنيه على الأقل فى اليوم.

 مش كل التوفير فلوس، أنت كمان وفرت تضيع وقتك فى الطريق كل يوم.

3. الهدوم: اه انت وفرت شرا هدوم جديدة بقاعدتك فى البيت، لأن كل مانزلت أكتر كل ما هدومك قدمت، فلو قلنا أنك مش هتشتري أكتر من تيشرت فى الشهر وأن ارخص تيشرت ب 150 جنيه، يبقي انت وفرت 150 جنيه على الأقل فى الشهر

4. الوقت: اه مش كل التوفير فلوس، أنت كمان وفرت تضيع وقتك فى الطريق كل يوم، بعد ما بقي مكتبك فى الأوضة اللي جنبك، وده اكيد ساعدك تخلص شغلك فى وقت أسرع وتبدأ تركز مع هواياتك.

5. أما بقي لو أنت صاحب شركة، فأنت أكتر واحد وفر فى الوضع ده، لأنك وفرت الكهرباء اللي بيستخدمها على الأقل 5 موظفين فى وقت واحد، للنور والتكييفات والكمبيوتر، خصوصا أن أسعار الكهرباء دلوقتى فى زيادة مستمرة، وبعد الزيادة اللي اتطبقت فى يوليو 2020 المكونة من 8 شرايح، ووصلت الشريحة الأولي فيها ل38 قرش من صفر ل 50 كيلو وات والشريحة التامنة فيها ل145 قرش  من صفر لأكثر من 1000 كيلو وات. أنت كمان وفرت اشتراك الانترنت لشهور، واللي هيتحدد على حسب احتياج شركتك لخدمات الانترنت، من الآخر أنت وفرت على الأقل 5 ألاف جنيه فى الشهر، لو شركتك صغيرة.