وفّر وحافظ على البيئة في يوم الأرض

اليومين دول، الواحد بيسمع كتير عن فكرة الاحتباس الحراري والتلوث البيئي، وإزاي إن البيئة بدأت تتعافى وثقب الأوزون مساحته قلت بشكل كبير بسبب فترة الحجر الصحي اللي العالم كله مر بيها، وده شجعنا كلنا بشكل كبير اننا نحافظ أكتر على البيئة ونحاول نحافظ على الكوكب اللي عايشين عليه، بس في نفس الوقت ساعات الموضوع بيبقى مكلف جداً، وعشان كدة بمناسبة ان النهاردة يوم الأرض 22 أبريل 2021  Earth Day هنقولك على طرق بسيطة تقدر تحافظ بيها على البيئة من غير ما تصرف كتير، وتوفر كمان.

امشي أو استخدم العجلة كل ما تقدر

أحياناً كتير الناس بتكسل تمشي مشوار هياخد مثلاً ربع ساعة، بس الحقيقة إنك لو استغنيت عن العربية، هتوفر بنزين وكمان المشي أو ركوب العجلة رياضة كويسة بالنسبة لك.

شيل كيس قماش معاك

بدل ما تستخدم أكياس بلاستيك كل ما تشتري حاجة، شيل معاك كيس قماش، وارفض الأكياس البلاستيك في المحلات.

مش لازم تتخلى عن كل حاجة في سبيل البيئة، ممكن بس ترشد استهلاكك ليها.

ما تستخدمش شاليموه

هو الواحد كان بيعمل إيه قبل اختراع الشاليموه؟ كان بيشرب من الكوباية على طول. الشاليموه هو حاجة الواحد مش محتاجها خالص، وفي شوية كافيهات بره ابتدوا يستغنوا عن توفير الشاليموه تماماً أو استبدال الشاليموه البلاستيك بشاليموه ورق أو استانليس.

قلل استخدام الكهربا أو الغاز في بيتك

مجرد تقليل استهلاكك للكهربا أو الغاز بيساعد البيئة، وبرضو هتوفر. اقفل كل الأنوار اللي مش محتاجها، شيل الفيش من الكبس، اقرا كتاب بدل ما تتفرج على التلفزيون، اقفل السخان. 

كُل على قدك

أحياناً الواحد بيطلب أكل كتير وبعد كدة يلاقي إنه مش قادر يكمله ويرميه في الزبالة، ممكن بدل ما ترميه تحتفظ بيه، وتاكله اليوم اللي بعده، أو تطلب أكل على قدك بحيث ما يبقاش فيه فائض.

مش لازم تتخلى عن كل حاجة في سبيل البيئة، ممكن بس ترشد استهلاكك للحاجة، وبكدة بتكون ساعدت البيئة باللي بتقدر عليه، أي حاجة بتفرق، حتى لو حاجة صغيرة.