10 طرق للتوفير في استعمال البنزين في مشاويرك اليومية

مع زيادة أسعار البنزين الأخيرة، بقى لازم نظبط استهلاك البنزين عشان ميحصلش تأثير سلبي على الميزانية وبالتالي الزيادة متأثرش على حاجات تانية اهم.

عشان كده جمعنا لك شوية أفكار هتساعدك توفر في استهلاكك للبنزين:

1- خلي بالك طول الوقت من درجة حرارة موتور العربية، لأن إهمالها بيزود استهلاك البنزين بنسبة 10%.

2- إلتزم بمواعيد تغيير الزيت بشكل منتظم لأن الاستهتار بيه بيؤدي لاستهلاك 10% بنزين زيادة.

3- إطارات العربية اللي مش ممتلئة بتستهلك بنزين أكتر بنسبة 70% وكمان لو العربية محتاجة ظبط زوايا بتستهلك 10% بنزين زيادة

4- بلاش مفاجآت في السواقة، يعني زود أو قلل سرعة العربية بالتدريج، لأن دوسة البنزين أو الفرامل جامد بشكل مفاجئ بيزود من استهلاك البنزين بنسبة 20%.

5- شارك رحلتك مع اصحابك، يعني دوّر على الناس اللي حواليك ومشوارهم قريب من مشوارك، وقسموا تمن الرحلة عليكم أو كل يوم اتحركوا بعربية حد فيكم، كده هتريّح نفسك من السواقة شوية وهتقلل كمان الزحمة واستهلاك البنزين.

تشغيل التكييف في المدينة بيستهلك بنزين أكتر بنسبة 20%

6- وقّف موتور العربية خالص في الإشارات لو حسيت أنها هتطول، لأن إعادة تشغيل الموتور مبيحتجش بنزين كتير، على عكس وضع الانتظار واللي يستهلك بنزين أكتر.

7- تشغيل التكييف في المدينة بيستهلك بنزين أكتر بنسبة 20%، لكن في الطرق السريعة بيستهلك 3% بس، فتجنب المشاوير في أوقات الحر الشديد!

8- اركن في الظل عشان متحتاجش تشغل التكيف اول ما تدخل العربية، وبكده استهلاكك للبنزين هيقل.

9- راجع الـ GPS قبل أي مشوار عشان تعرف أقصر طريق وإيه اللي فاضي فى الوقت ده.

10- ظبطوا مواعيد سفركم مع بعض وامشوا وراء بعض على الطريق السريع عشان تتجنبوا مقاومة الهواء وحرق البنزين بزيادة.