3 طرق توفير بسيطة عشان تسافر هتفرق معاك

أحياناً الواحد بيعتقد إن السفر ده حاجة مستحيلة بسبب التكاليف العالية اللي بتقابلنا زي مصاريف الفيزا، ومصاريف حجز تذكرة الطيارن، ومصاريف الفنادق، وهكذا، بس في حاجات بسيطة ممكن تعملها عشان تحوش فلوس كفاية وتستخدمها للسفر.

1. اتخلى عن العادات اللي بتكلفك فلوس بس مردودها ضعيف

النقطة دي ممكن الواحد يلاقيها صعبة لإن كسر العادات بيحتاج وقت ومجهود، بس لو نجحت فيها، هتلاقي إنك بتوفر فلوس كويسة ممكن تستخدمها في حاجات تانية أفضل. أمثلة على بعض العادات المكلفة اللي ممكن تتخلى عنها.

• أكبر مثال على عادة مكلفة هي طبعاً السجاير، وأكيد أي حد هيتفق إن مردود السجاير قليل جداً، بالعكس دي أصلاً ممكن تكلفك فلوس زيادة لو سببتلك أمراض.

• الكفايين، سواء القهوة أو الشاي أو المشروبات الغازية، دي حاجات كلها بتأثر على الجهاز العصبي ولو فيها سكر بتبقى مضرة للصحة، وممكن طبعاً تقول بس الكولا بـ5 جنيه يعني، مش فارقة، بس أنت لو صرفت 5 جنيه كل يوم، يبقى هتصرف 150 جنيه في الشهر، يعني 1800 جنيه في السنة، وده تقريباً ثمن مصاريف الفيزا.

في حاجات كتير ممكن تتخلى عنها في سبيل إنك تحقق هدف من أهدافك

2. شيل مبلغ صغير على جنب كل أسبوع

الواحد لما بيفكر في التوفير، دايماً بيفكر في أرقام كبيرة، ولكن حتى المبالغ الصغيرة ممكن تساعدك بمرور الوقت، فحاول كل أسبوع تشيل على الأقل 20 جنيه على جنب أو حطهم في حساب التوفير بتاعك، وهتلاقي إنك على آخر السنة حوشت ألف جنيه أو أكتر في حسابك.

3. بيع الحاجات اللي مش محتاجها

أغلب الوقت الواحد بيبقى عنده كراكيب كتيرة في البيت، الحاجات دي لو بعتها على موقع زي أولكس أو Facebook Marketplace، هتجيبلك شوية فلوس ممكن تشيلهم على جنب.

لو فكرت قبل ما تصرف، هتلاقي إن في حاجات كتير ممكن تتخلى عنها في سبيل إنك تحقق هدف من أهدافك، والموضوع ممكن يبقى صعب في الأول، بس مع التعود، بيبقى أسهل.