5 أسباب بتخلي البنك يرفض طلبك للتمويل وازاي تقدر تتفاداها

في بعض الأوقات بعد ما تكمل كل الأوراق المطلوبة وتبعتها للبنك، ممكن البنك يرفض طلب التمويل بتاعك، وده بيكون بسبب مشاكل في البيانات اللي قدمتها للبنك زي مثلاً :

1- نسبة عبء الدين (الـ DBR)

وهي مقدار الالتزامات الشهرية المالية اللي عندك للبنوك والمؤسسات المالية بالنسبة لإجمالي دخلك، يعني الأقساط اللي عليك من قروض وكريدت كارد بتشكل نسبة كام في المية من دخلك الكلي، والبنك المركزي في 2019 حدد نسبة عبء الدين على الكريدت كارد/Credit Card والقرض الشخصي وقرض العربية كمان، ووصلها لـ 50% من المرتب الشهري.

أما بالنسبة للتمويل العقاري أو قرض المنازل فـ النسبة فضلت زي ما هي 40%.

لو عايز تعرف أكتر عن الـ DBR مممكن تدخل هنا، إيه هي نسبة عبء الدين الـ DBR على المنتجات البنكية؟

2- الـ I- Score

وده عبارة عن تاريخك الائتماني من بداية تعاملك مع البنوك لحد دلوقتي، وعلى الأساس ده البنك بيدرس اذا فيه مخاطرة لو وافق على تمويلك ولا لأ، عشان كده لازم تكون مظبط كل تعاملاتك البنكية وبتسدد في ميعادك، والبنك هو اللي بيستعلم عن تاريخك الائتماني لو قدمت على أي تمويل عن طريق الشركة المصرية للاستعلام الائتماني، وتقدر انت كمان تقدم طلب استعلام للشركة لو عايز تعرف اذا حصل تغيير في الـ I-Score ولا لأ.
 

لو عايز تعرف أكتر عن الـ I-Score ممكن تقرأ هنا، يعني إيه I-Score, وتأثيره على علاقاتك بالمنتجات البنكية!

لو الشركة ليها موقع على الانترنت أو أكتر من فرع، ده بيخلي فترة تكويدها في البنك أسرع

3- شركتك مش متكودة في البنك
 

كل بنك بيطلب ان شركتك تكون متكودة / متسجلة فيه وده عشان يقدروا يدرسوا استقرار حالة الشركة ونسبة المخاطرة فيها وبالتالي وظيفتك ودرجة استقرارها، فـ اذا شركتك مش مكودة في البنك  فـ هيطلب منك شوية أوراق زيادة عشان يتم تكويدها زي: 

• اثبات ان الشركة فيها أكتر من 50 موظف
• رأس مال الشركة أكتر من 50,000 جنيه
• مجال عمل الشركة
• لو الشركة ليها موقع على الانترنت أو أكتر من فرع، ده بيخلي فترة تكويدها في البنك أسرع

وفيه بعض البنوك ممكن تستغنى عن تكويد الشركة بـ كشف الحساب البنكي للعميل.
 

4- كشف حساب بنكي ضعيف
 

ممكن كشف الحساب اللي قدمته للبنك يكون ما بيدخلش فيه فلوس بشكل منتظم أو مجموع الدخل اللي بيجيلك خلال فترة معينة مش مناسب مع المبلغ اللي انت طالبه وده بيخلي حسابك من وجهة نظر البنك ضعيف.

5- نتيجة استعلام سلبية

من ضمن إجراءات مراجعة البنك الاستعلام عن محل سكنك ومحل العمل، فـ إذا أي مكان من الاتنين مش ظاهر فيه استقرارك بالنسبة لموظف البنك، فـ ده ممكن يبقى سبب لرفض طلبك.
 

شوية نصايح تساعدك ان طلبك يتقبل بنسبة أكبر

1- احسب نسبة عبء الدين أو الـ DBR الخاص بيك قبل ما تقدم على القرض عن طريق حاسبة فايدتي للـDBR من هنا.

2- عشان تظبط تاريخك الائتماني خلي بالك من الحاجات دي:

• سدد الأقساط اللي عليك في وقتها
• ما تلغيش الكريدت كارد/ Credit card
• لو عليك قرض ومش قادر تسدد باقي الأقساط في ميعادها، اطلب من البنك إعادة الجدولة أو إعادة تمويل القرض.
• بعد ما تضبط تسديد ديونك، استنى سنتين قبل ما تحاول تقدم على قروض جديدة.

3- ظبط إيداعاتك وسحبك على حسابك البنكي بحيث يكون فيه إيداع بشكل منتظم كل فترة معينة.

وخلي دايما موقع فايدتي أول خيار ليك للبحث عن بنك للتقدم على بطاقة ائتمان أو قرض شخصي. ولو أي حاجة وقفت معاك إسألنا فى أي وقت من خلال زرار الواتساب.