5 أسباب لاستخدام الكريدت كارد في المشتريات اليومية

 استخدام الكريدت كارد ممكن يكون مخيف، خصوصاً لو أول مرة، وفي ناس كتير فاكرة إن استخدامه بيبقى في أوقات معينة بس، ولكن في الحقيقة هو ممكن تستخدمه في مشترياتك اليومية، وبيبقى له شوية فوايد.

1- المكافآت

ده يمكن يكون أكبر سبب لاستخدام الكريدت كارد يومياً، لإنك كل ما بتستخدمه بتجمع نقط على حسابك، وبعد كده لما تجمع شوية حلوين، تقدر تستخدمهم بكذا طريقة على حسب نوع الكارت بتاعك، وطريقة حساب البنك للنقط، وطريقة صرف البنك للنقط. فمن الممكن إنك تصرفهم في صورة e-vouchers من محلات معينة، أو ممكن تبقى في صورة أميال تستخدمها في سفرياتك، أو ممكن حتى في صورة كاش باك، ينزل في حسابك.

2- تطوير الـ I-Score بتاعك

استخدام الكريدت كارد وتسديدة في الوقت الصح بيساعدك تبني الـI-Score بتاعك، وده بيساعدك في تطوير تاريخ ائتماني كويس عشان لما تيجي تقدم على قرض أو كريدت كارد في المستقبل، البنك بيبص على تاريخ الائتماني، وبيحدد على أساسه المنتجات المتاحة لك، ونسبة الفايدة، وهكذا.

البنك بيعملك كشف حساب شهري بمعاملات الكريدت كارد بيبقى عليه المبالغ المصروفة ومكان صرفها

3- عندك حد على عدد المعاملات على حسابك

لو كارت الخصم المباشر بتاعك عليه حد لعدد المعاملات اللي ممكن تعملها في الشهر، يبقى استخدام الكريدت كارد هيريحك من قلق إنك تعدي الحد ده، وتضطر إنك تدفع غرامة للبنك، لإن الكريدت كارد ما بيبقاش في حد على رقم المعاملات، ولكن الحد بتاعه هو الحد الائتماني للكارت، أو أقصى مبلغ ممكن تصرفه.

4- لو عايز تستغنى عن الكاش

في ناس كتير بيحسوا إن الكاش مش عملي لإنه سهل يتسرق، وبعدين بياخد مكان كبير في المحفظة، ولو مبلغ كبير هيبقى قلق جداً، فعشان كدة استخدام الكريدت كارد هيوفر عليك القلق ده، وهيقلل الحاجات اللي لازم تشيلها معاك.

5- عايز تعرف مصروفاتك بالتفصيل

البنك بيعملك كشف حساب شهري بمعاملات الكريدت كارد بيبقى عليه المبالغ المصروفة، ومكان صرفها، ده غير إنك لو مفعل خدمة الإخطارات، البنك بيبعتلك رسالة بالمعلومات دي كل ما بتستخدم الكريدت كارد.

قدم دلوقتي علي بطاقة الائتمان اللي محتاجها مع فايدتي في دقايق من مكانك.