5 أفكار سلبية بتبوظ علاقتك بالفلوس وبتمنعك تعيش حياتك

الشهر ده عندنا اليوم العالمي للتفكير الإيجابي "World Think Positive Day" يوم الاثنين 13 سبتمبر، والتفكير الإيجابي مش رفاهية أو مخصوص لفئة معينة من الناس، بالعكس لأن التفكير الإيجابي بشكل عام بيحسن من حالتك المادية قبل النفسية، لأنك بتعرف تتصرف صح وتفكر وتخطط لميزانيتك بشكل سليم.

ومن ضمن الأفكار السلبية اللي محتاجين نفكر فيها بشكل مختلف:
 

1- "المرتب قليل ومابيكفيش التحويش"

حاول تفكر في ان المشكلة مش في المرتب لكن في طريقة ترتيب الأولويات اللي عندك، وده ليه أكتر من طريقة زي مثلا:

• اعرف كويس الفرق بين الضروريات و الرفاهيات عشان ما تتغريش بأي حاجة قدامك.
• قسم مرتبك على أسابيع وحاول تلتزم ان كل أسبوع تصرف بس المبلغ المخصص ليه.
• حاول تستغنى عن شوية خدمات تقدر تعملها لنفسك في البيت زي القهوة و الدراي كلين.

اعرف من هنا عن أكتر 7 طرق هتساعدك تحوش وتوفر فلوسك

2- "صعب جداً الايام دي شخص عادي يتحول غني"

الأسعار زمان كانت رخيصة بالنسبة لأسعار دلوقتي، بس ده مش معناه انها كانت رخيصة بالنسبة لمتوسط الدخل وقتها!

فـ زمان ودلوقتي زي بعض، والحقيقة ان اي شخص عشان يبقى غني في أي وقت من الأوقات لازم يبذل مجهود، ده غير ان بسبب التكنولوجيا دلوقتي بقى عندك مجالات استثمار أكتر وطرق كتير هتساعدك تعرف المفيد أكتر ليك، وتقدر تتواصل مع محللين ماليين من أي مكان في العالم عشان يساعدوك أو تسمع نصايحهم، كل ده مع شوية مجهود هتقدر تبقى غني. وخلي بالك ان مع الوقت هتلاقي ان دلوقتي كان أسهل بالنسبة للأيام الجاية.

3- "عمري ما هخلص الديون اللي عليا"

فيه أكتر من طريقة تقدر بيها تعيد جدولة الديون اللي عليك، زي مثلاً انك تروح لبنك تاني يشتري المديونية اللي عليك ويعيد تقسيطها بشكل مريح أكتر، أو أنك تدور على أي وظيفة تانية أونلاين تجيبلك دخل اضافي فـ تقدر تسدد أسرع.

اعرف أكتر عن التخلص من الدين من هنا، 10 طرق هتساعدك عشان تتخلص من الديون

4- "عمري ما هفهم الاستثمار بشكل يخليني أبدأ فيه"

الاستثمار مش موضوع صعب، بس ممكن يكون فيه شوية مخاطرة، لأن كل ما بتزيد المخاطرة بيزيد الربح والعكس صحيح، المهم انك تبتدي وهتتعلم بالممارسة، وكمان دلوقتي بقى فيه أكتر من أبلكيشن وصانعين محتوى بالعربي بيوفروا معلومات كتير عن كل مجالات الاستثمار وازاي تبتدي فيهم.

ادخل هنا واعرف أكتر 6 طرق بسيطة لاستثمار فلوسك وتحقيق عائد منها

5- "عمري ما هيكون معايا فلوس زي فلان"

كل واحد فينا له طريقه المختلف تماماً عن أي حد تاني، لو عايز تكون زي فلان هتقدر بس بطريقتك الخاصة، أنت قدراتك غير قدرات أي حد، عشان كده طريقك مختلف، فـ متقارنش نفسك بأي شخص ممكن يكون معداش بنفس ظروفك، قارن نفسك دلوقتي بنفسك زمان وده بس اللي هيحسبلك إذا بتتقدم ولا لأ.