5 خدمات لو استغنيت عنها هتوفر كتير

أكيد عارف جملة "والله مش عارف المرتب بيروح فين؟" كلنا بنقولها كل آخر شهر، واجابتها ببساطة أنك بتصرف فلوسك فى خدمات كتير ممكن تستغني عنها بطرق تانية أوفر، من الخدمات دي :

1- الدليفري: 

ليه تطلب أكل من بره لما تقدر تطبخه فى البيت، أو على الأقل تبقي عامل حسابك أنك مش هتاكل غير وجبة واحدة بره مع أصحابك فى الويك أند أو مع زمايلك فى الشغل طول الأسبوع.

 كمان بدل ما تنزل تجيب قهوة كل يوم قبل الشغل ممكن تعملها فى البيت وتوفر وقت وفلوس.

2- التنضيف:

تنضيف هدومك  والسجاد والستاير و…...واي حاجة ممكن تبعتها اللاندري، بسهولة ممكن تستغني عن اللاندري وتنضف أنت فى البيت، كمان هدومك اللي طلعة نزلة على المكوجي ممكن تبدأ تكويها بنفسك بالمكواعه اللي أكيد مستخبية فى حتة فى البيت.

 ممكن تبدأ تتنازل شوية وتستغني عن ركوب التاكسي واللي بيعادله من عربيات بتطلب بأبليكشن وتبدأ تركب مواصلات عامة زي الأتوبيسات والمترو.

3- التلفزيون والانترنت:

طبعا محدش يقدر يستغني عن التلفزيون، بس ممكن تستغني عن القنوات اللي ليها اشتراك وتجيبها على الانترنت لما تحتاجها، وبما أن معظمها بتاعت ماتشات فممكن تبقي تشوف الماتش اللي عايزه على القهوة. 

كمان مواقع الافلام والمسلسلات الجديدة اللي بقى ليها اشتراك ممكن تستغني عن الاشتراك فيها وتشوف الحاجة متأخرشوية لما تنزل ببلاش على التلفزيون أو على المواقع المجانية.

4-العناية بالجسم:

الكوافير والحلاق والسبا كلها حاجات ممكن تستغني عن زيارتها وتكتفي بأنك تروحها فى مناسبات، وسهل أوي تهتم بنفسك فى البيت بالكريمات والحاجات اللي كدا كدا بتشتريها.

5-ابلكيشن المواصلات والتاكسي:

لو حسيت أن مشوارك اليومي للشغل طويل وطبعا كل الطرق دلوقتي زحمة فأكيد ده بيزود فى فاتورتك، ممكن تبدأ تتنازل شوية وتستغني عن ركوب التاكسي واللي بيعادله من عربيات بتطلب بأبليكشن وتبدأ تركب مواصلات عامة زي الأتوبيسات والمترو.

 

يمكن نكون بنتكلم فى حاجات بسيطة مبتحسش بيها فى يومك العادى، بس أكيد لو قدرت تغير من عاداتك هتفرق معاك كتير فى ميزانيتك على المدى الطويل.