5 مواقف هتحتاج تستخدم فيها الكريدت كارد/ فيزا مشتريات

فكرت قبل كده تقدم على كريدت كارد؟ لو فكرت في الموضوع يبقي أكيد عندك أسبابك، أما لو الموضوع مجاش علي بالك قبل كده فـ احنا هنقولك على 5 أسباب هتحتاج تستخدم فيها بطاقة الائتمان، وتقدر تعرف كل أسرار البطاقة من هنا قبل ماتقدم.

1- كريدت كارد للسفر:

من مميزات الكريدت كارد أنك تقدر تستخدمه في أي مكان في العالم، وده ممكن يجنبك تغيير العملة وانت مسافر، بس في شوية نقط لازم تأخد بالك:

• بلاش تحاسب بالجنيه المصري علشان ساعتها البنك بتاعك ممكن يحاسبك على نسبة التحويل من العملة المصرية للأجنبية.
• اتأكد إن البلد اللي أنت مسافر ليها بتقبل نوع البطاقة بتاعتك، لأن في بعض البلاد منتشر فيها واحد بس من انواع الكروت أكتر من التاني، فيزا ومستر كارد، وبيكون صعب تلاقي مكان قابل التعامل مع النوع التاني.

2- تجهيزات الجواز:

لو بتجهز للجواز قريب فـ الكريدت كارد يعتبر حل مناسب ليك عشان تشتري اللي محتاجه وتسدد بعدين لما تقبض المرتب أو الجمعية، لأن البطاقة بتديلك فترة سماح بتبدأ من 48 يوم وبتوصل 58 يوم في بعض البنوك.

3- المشتريات اليومية:

بطاقة الائتمان ممكن تساعد في معاملاتك ومشترياتك اليومية، خصوصا أنها بتحل لك كذا مشكلة، زي:

• تسديد الكريدت كارد في وقتها بيساعدك تبني الـ I-score/تاريخك الائتماني، وده هيفيدك في حالة أنك احتجت في المستقبل تقدم على أي نوع من القروض.
• لو معاملاتك المالية الشهرية بتتعدي الحد اللي بيديهولك كارت الخصم المباشر، فالتعامل بالكريدت كارد هيسهل عليك الموضوع وهتقدر تسحب اللي محتاجه.
• لو انت من الناس اللي بتنسي صرفت فلوسها في إيه، فـ البنك بيقدملك كشف حساب شهري بمعاملات الكريدت كارد بيبقى عليه المبالغ المصروفة، ومكان صرفها، ده غير إنك لو مفعل خدمة الإخطارات، البنك بيبعتلك رسالة بالمعلومات دي كل ما بتستخدم البطاقة.

البنك بيقدملك كشف حساب شهري بمعاملات الكريدت كارد بيبقى عليه المبالغ المصروفة، ومكان صرفها.

4-تجميع النقط/ الـ  Bonus Points 

كل أستخدام ليك لبطاقة الائتمان بيتحسبلك بيه نقط، وبتقدر تأخد علي النقط ديه هدايا مختلفة، هي:

• أميال للسفر/ Miles، زي تذاكر طيران أو حجز في فنادق
• قسائم شراء/ vouchers  من المحلات اللي متعاقد معاها البنك بتاعك
• كاش باك/ Cashback  على رصيدك

لو محتاج فعلا بطاقة ائتمان وشايف أن الـ Bonus Points  دي مفيدة ليك، فكل اللي عليك انك تقدم على البطاقة وتستخدمها علي قد ماتقدر عشان تجمع نقط أكتر.

5-آمن وأسهل

من مميزات بطاقة الائتمان انك تقدر تستخدمها في أي مكان عنده ماكينة POS، ماكينة بيع آلي، من غير ما تكون مضطر تشيل فلوس كاش دايما، يعني بتفك زنقتك في أي مكان، وده كان سبب اختراعها من البداية.

أعرف عن تاريخ الكريدت كارد من هنا.

بسبب انتشار فيروس كورونا بقي الاعتماد على الكريدت كارد بيعتبر من طرق التباعد الاجتماعي اللي بتجنبك انتقال الكاش من إيد لإيد مع فرصة تنقل الفيروس في العملية دي. وبالنسبة للأمان فتقدر توقف البطاقة في حالة السرقة أو الاشتباه في أي عملية نصب عن طريق التواصل مع البنك بتاعك.

قدم دلوقتي علي الكريدت كارد/ Credit Card اللي محتاجها في دقايق مع فايدتي