7 طرق للتوفير في طلبات البيت
تاريخ النشر: 07 سبتمبر 2020 نصايح ببلاش
ازاي تخلي نزولة السوبر ماركت خفيفة على جيبك؟
كلنا عايزين نقلل في المصاريف، وفي مصاريف ما بتقدرش تتحكم فيها زي مصاريف المدرسة مثلاً، ولكن في حالة طلبات البيت، فأنت المتحكم الوحيد، وفي حاجات بسيطة ممكن تعملها عشان تقدر توفر.
1. قارن الأسعار أونلاين
ما تروحش لسوبرماكت واحد من غير ما تقارن، وأحسن طريقة عشان تعرف العروض المتاحة من غير ما تلف حوالين نفسك زي الفرخة الدايخة، هو إنك تشوف أونلاين، كل اللي أنت محتاجه إنك تكتب "عروض كارفور" مثلاً في جوجل، وهيطلع لك آخر العروض المتاحة.
2. احسب وأنت بتتسوق
لو أنت عندك ميزانية لطلبات البيت، أحسن طريقة لإنك تتأكد من إنك ما تعديش الميزانية دي هي إنك تحسب الفلوس وأنت بتتسوق، والموضوع بيبقى سهل لو استعملت كالكوليتر، وكل ما تحط حاجة في عربيتك تضيفها للكالكوليتر، وأول ما توصل للرقم اللي أنت محدده، تروح تحاسب.
3. استخدم باسكيت بدل من عربية
لما تروح السوبرماركت وأنت محدد حاجات معينة لازم تجيبها، الموضوع هيبقى أسهل لو قللت المساحة المتاحة عشان ما يبقاش في إغراء إنك تملى العربية، فبدل ما تستخدم عربية، خد باسكيت وهتلاقي إنك هتعرف لما الحاجة تزيد عن اللي أنت محتاجه عشان الباسكيت هيتقل.
في حاجات كتير ممكن تجيبها من العطار بأسعار أوفر من السوبرماركت خصوصاً البقوليات زي الفول، والعدس، وحتى الرز والمكرونة.
4. سيب العيال في البيت
إحنا بنبقى عايزين ناخد عيالنا في كل حتة، بس السوبرماركت ممكن ما يبقاش أفضل مكان ليهم لإنهم هيشبطوا في حاجات كتير، وممكن لإنك مش عايز تكسر نفسهم، تلاقي إنك بتشتري حاجات أكتر من اللي أنت محتاجه، وعشان كدة أحسن تسيبهم في البيت.
5. بص على الأرفف كلها
لما تيجي تبص على منتج معين، عادة عينك بتيجي على الرف اللي في النص، رغم إن في منتجات تانية فوق وتحت، عود نفسك تبص على كل المنتجات المتاحة، لإن في أغل الأوقات الرف اللي في النص بيبقى عليه أغلى المنتجات.
6. اشتري كميات لما يكون في عرض
لو لقيت عرض كويس على منتج أساسي ، اشتري كمية أكبر شوية من المعتاد وخزنها. أنت ممكن حتى تشتري لحمة أو فراخ وتحطها في الفريزر. هتلاقي إنك هتدفع أكتر شوية، بس هتوفر أكتر في الزيارات المستقبلية للسوبرماركت.
7. اشتري من العطار
في حاجات كتير ممكن تجيبها من العطار بأسعار أوفر من السوبرماركت خصوصاً البقوليات زي الفول، والعدس، وحتى الرز والمكرونة، وميزة العطار إنك ممكن تشتري على أد ما أنت محتاج، بدل ما تدبس في كميات كبيرة أنت مش محتاجها.
