8 نصائح لحماية حساباتك البنكية من التعرض للسرقة والاحتيال

بعد عمليات النصب والسرقة الاخيرة اللي حصلت مع بعض عملاء بنك مصر، من واحدة من العصابات الإلكترونية، كل واحد لازم يأخد باله من كل معاملاته البنكية، المرة دي البنك قدر يرجع الفلوس للعملاء لكن محدش عارف إيه اللي ممكن يحصل المرة جاية.

عشان كده هنقولكم على شوية نصايح تتبعوها عشان تحموا حساباتكم البنكية، باختلاف إذا كان حساب توفير أو جاري أو بطاقة ائتمان.

1- احتفظ بالرقم السري لنفسك، بدون ما تشاركه مع أي حد. 

2- نفس الحال مع الـ CVV، ال3 ارقام اللي موجودين على ضهر الكارت، متشاركهمش مع أي حد

3- ماتبعتش الـ OTP  بتاعك لأي شخص، وهي كلمة السر لمرة واحدة اللي البنك بيبعتهالك لما تطلب منه الدخول لمراجعة حسابك، وبتجيلك على رقم موبايلك اللي مسجله فى البنك.

بُص على كشف الحساب الشهري عشان تتأكد إن مافيش أي معاملات غير مصرحة

4- اتجنب فتح الانترنت البنكي مع اتصالك بـ Wifi عام، فى مول مثلاً، عشان متسيبش فرصة ان حد يوصل لحسابك.

5- لو عايز تحدث بياناتك أو تغيير أي حاجة فيها أعمل ده من خلال موظف البنك في مقر البنك نفسه

6- اشترك في خدمة الإخطارات البنكية: الخدمة دي بتبعتلك رسالة على التليفون كل ما بيتم استخدام الكارت، والرسالة بيبقى فيها المبلغ المسحوب والمكان أو الموقع اللي تم استخدام الكارت فيه.

7- بُص على كشف الحساب الشهري عشان تتأكد إن مافيش أي معاملات غير مصرحة، ولو حصل إن لقيت في معاملات غريبة لازم تبلغ البنك على طول.

8- ما تستخدمش كارت الدفع في مواقع غير مضمونة أو غير مؤمنة إلكترونياً لإن ده بيعرضك لخطر سرقة البطاقة، عشان كدة يُفضل استخدام بطاقتك في مواقع معروفة فقط. في نفس الوقت بلاش توافق على حفظ بيانات الكارت في أي موقع، لإن لو تم اختراق الموقع أمنياً ده هيعرضك لخطر سرقة الكارت.

وأهم نصيحة، حاول دايما ان انت اللي تتواصل مع البنك مش العكس عشان تضمن أن دي خدمة عملاء البنك فعلاً!