ممكن ضريبة البلوجرز واليوتيوبرز تحسن من مستوى المحتوى؟

انتشر على مواقع التواصل الاجتماعي خبر إعلان مصلحة الضرائب بفرض ضريبة على البلوجرز واليوتيوبرز بما فيهم الصفحات اللي بتبيع اونلاين، ودي تعتبر خطوة ايجابية هتساعد الدولة في تحقيق الشمول المالي عن طريق حصر المجتمع الغير رسمي وحصر المكاسب اللي بتيجي عن طريق الانترنت او اللي بتيجي من بره مصر.

تفاصيل الخبر

الضريبة دي هتتفرض على الحسابات التي بيتم عن طريقها بث محتوى بهدف الربح، لكن حسابات الشخصيات العامة وصناع المحتوى الغير هادف للربح المادي مفيش عليهم ضريبة مستحقة، وعشان القرار ده يتنفذ أنشأت مصلحة الضرائب وحدة للتجارة الالكترونية وبدأوا في التواصل مع المصادر اللي بتوصل الإيرادات للبلوجرز واليوتيوبرز عشان تجمع البيانات الخاصة بيهم، كمان بدأت في مراسلة أصحاب بعض الصفحات ومطالبتهم بالتوجه للمأموريات اللي تبع مصلحة الضرائب عشان يسجلوا ملفاتهم.

 مش هيتم محاسبة أي بلوجر على المكاسب اللي اخدها قبل التسجيل وفتح الملف

ازاي هيتم حساب الضريبة؟

كل أصحاب الشغل الاونلاين اللي بيكسبوا أكتر من 250 ألف جنيه في السنة من تاريخ بدء النشاط لازم يروحوا لمقر وحدة التجارة الإلكترونية بمصلحة الضرائب المصرية وفتح ملف ضريبى، وده عشان يتجنبوا الوقوع في جريمة التهرب الضريبي اللي عقوبتها ما بين 3 و5 سنوات.

ده غير ان هيتم تطبيق ضريبة القيمة المضافة الـ 14% على أي خدمة إعلانية هيقدمها البلوجر.

كده كده مش هيتم محاسبة أي بلوجر على المكاسب اللي اخدها قبل التسجيل وفتح الملف، إنما هيتم محاسبتهم على المكاسب اللي جاية من بعد تاريخ التسجيل.

اقرأ كمان: ماتش ملاكمة بين يوتيوبر مشهور وملاكم محترف...مين يكسب؟

نسبة المبلغ اللي الضرايب هتحصله من البلوجرز هي 1% من إجمالي المكاسب، يعني مثلاً اللي بيكسب من 250 ألف لـ 500 ألف جنيه هيدفعوا 2,500 جنيه في السنة.

تأثير الضريبة على المحتوى!

فى الفترة الأخيرة فيها ناس كتير اتشهرت على السوشيال ميديا بمحتويات غريبة، زي العائلات اللي بتشارك حياتها على الهوا، وبعد ماكان المكسب بالألف من غير محاسبة هل ممكن تأثر الضريبة الجديدة على مستوي المحتوي اللي بيقدمها البلوجرز واليوتيوبرز خصوصا بعد التركيز المجتمع كله معاهم! شاركنا إجابتك على الفيس بوك!