5 مواقع هتساعدك إنك تزود دخلك من البيت!
تاريخ النشر: 16 ديسمبر 2021 نصايح ببلاش
خمسات من أكبر مواقع العمل الحر على الانترنت في الوطن العربي وسهل الاستخدام
مهما كان مجال شغلك تقدر تزود دخلك من البيت في وقت فراغك، هنقدملك 5 مواقع تقدر تعمل عليها أكونت بكل سهولة وتستقبل طلبات العملاء وتكسب من خلال العمل الحرعلى الإنترنت، والمواقع دي بتقوم بدور الوسيط بين الـ Freelancer و الـ Client .
1- Up work
أقوى موقع عمل حر في العالم، ويُفضل تكون لغتك الانجليزية كويسة لاستخدامه، وكمان الخدمة اللي بتقدمها بالاحترافية المطلوبة لأن نوعية العملاء اللي عليه بيحبوا ده.
آب وورك عليه ملايين الأشخاص من جنسيات مختلفة سواء من أصحاب الأعمال أو اللي بيقدموا خدمات، ونظام الشغل عليه بيكون يا إما بالساعة أو مشروع "شغل ثابت".
أما بالنسبة لأشهر مجالات العمل المتاحة على الموقع: تطوير الويب والموبايل والبرمجيات، وتكنولوجيا المعلومات والشبكات، والبيانات، الهندسة، والتصميم، والكتابة، والترجمة والتسويق.
2- خمسات Khamsat
أكبر سوق عربي لبيع وشراء الخدمات المصغرة، وهتلاقي فيه مجموعة كبيرة جدًا من رواد الأعمال وكمان الشباب العربي اللي بيقدموا خدماتهم عن طريق العرض والطلب، وتقدر تحقق مكسب كويس، ونسبة الموقع من الربح 20% يعني 1 دولار بس على كل 5 دولار.
ومن ضمن الخدمات اللي تقدر تقدمها على خمسات: برمجة وتطوير، وتسويق إلكتروني، وتدريب عن بعد، وتصميم فيديو والتصميم عمومًا، وصوتيات زي الفويس أوفر وكمان الترجمة والكتابة بكل أنواعها.
فايفر Fiverr شبه موقع خمسات لكن عليه نوعية مختلفة من العملاء والتنافس فيه أقل شوية
3- Fiverr
شبه موقع خمسات لكن عليه نوعية مختلفة من العملاء والتنافس فيه أقل شوية، ويُفضل يكون عندك مهارة في اللغة الإنجليزية.
ومن المجالات اللي تقدر تقدمها وتكسب من خلالها على فايفر: تصميم الرسومات، والتسويق الرقمي، والكتابة والترجمة، الفيديو والرسوم المتحركة، والموسيقى والصوت، والبرمجة والتكنولوجيا، وإدخال البيانات.
4- Freelancer
موقع فري لانسر تقدر تقدم عليه خدمات كتير جدًا منها: الكتابة والترجمة، التسويق والمبيعات، إدخال البيانات، الخدمات القانونية، والموارد البشرية وتصميم وتطوير المواقع.
5- tasmeemME
أكبر شبكة للمصممين في الوطن العربي وبالتالي لو انت شاطر في التصميم عمومًا فده مكانك الأنسب لأنك هتلاقي عليه وظائف كتير جدًا وكمان الموقع بيوفر وظائف بالدوام الكامل أو الجزئي وكمان عن بعد، وعليه آلاف المصممين.
خلي بالك!
ماتنساش تقرأ شروط الاستخدام كويس جدًا وتعرف ايه المجالات علشان تقرر هتقدم خدمة ايه بالظبط باحترافية وتقدر تنافس وتحقق مكاسب في أسرع وقت ممكن.
